經過10多個鐘飛機，終於到達約旦首都安曼，一落機係當地時間朝早五點幾，
今日行程將會到聞名全球既古城佩特拉，相信不小人都係電影中見過呢個場景，
歷史方面就唔多講可參考google wiki，主要都會講些分享及小心得
約旦既交通唔發達，若果由機場搭公共交通前往佩特拉費時兼麻煩，沿路上亦見不小人載順風車，
所以今次行程係全自駕，價錢十分經濟小車約200-300hkd一天，另外中東地區油錢平就唔洗講，
過了關第一步就係買上網sim卡，機場有網絡商zain，幾日百幾蚊任上，
租車就選了sixt（24小時開放），gps方面建議google map都夠，無需另加錢向租車公司租，
至於兌換當地方幣jod，最好就帶定美金歐羅傍身，當地唔收港幣的
就算去櫃員機撳錢，雖然寫住有銀聯，但係都係撳唔到錢嘅，有張plus卡會好d
由機場開車大概三個小時就到，沿途會有警察road block，會示意我哋出示國際車牌，三個小時車程入邊就遇到五次😂
同埋沿途公路整得唔靚所以我哋後悔做咗格細車，其實租四驅車比較合適 ，
今次我哋係佩特拉既住宿就係movenpick ，係呢區得分較高兼大型5星酒店，離古城入口只需1分鐘
不小旅行團都會選擇入住此酒店，要訂就要早，
我們選擇包自助晚餐的房價約2000一晚，但其實旁邊都有不小餐廳，不包餐也可以
酒店充滿中東色彩，
設有多間餐廳及酒吧，原先想到酒店既天台酒吧，不過冬天沒有開，
不過唔緊要，附近都有間好靚既洞穴餐廳，稍後會作介紹
標準大床房，空間十分充足
酒店仲設有gym及暖水泳池，就算冬天黎游都無問題
酒吧及自助餐廳，自助餐質素就普普通通，建議出外面食
酒店內商店，當然唔小得有自家品牌雪糕賣
分享完酒店，係時候到重點古城佩特拉，
先前都提過，酒店離古城佩特拉入口非常近，基本上就係對面馬路
從入口到「蛇道」（Al Siq）要行一段路，
係門口附近一定會有人撩你騎馬去到蛇道入口，通常會同你講張門票包埋，
事實門票真係有寫包埋，不過當然要俾d小費啦，每人預5 jod約50hkd
其實門口有告示牌講各種古城內交通既收費，不過可以講係廢既，稍後就會講下真正既價格
騎馬只可以到「蛇道」（Al Siq）入口，之後就要靠行或搭馬車，
黎到蛇道入口，有d cosplay友會撩你影相，當然又係收小費啦，唔理就ok，
蛇道真係一個不停影相既點，十分之有趣既地形，沿路風景十分美麗
行下影下，不經不覺就到了 Treasury (Al-Khazneh) (其實都行左差不多2-3km)
好多旅行團行到呢到都會停唔會再入，因為行到最入面要行成8km
係呢到會有些商店及茶座，係到休息下飲過茶幾寫意的
之前都有講古城內有唔同種類既交通，
小編跟住自己既經驗得出既價格，
由入口至蛇道入口，騎馬約5jod，
由入口至treasury, 馬車約30-40jod，睇你講價技巧，
由treasury至最入monastery，駱駝/驢 約20jod
treasury去monastery沿路景色，有經過 Street of Facade，Roman Theater ，The Court
由於晨早5點鐘到加上渣左3個鐘車，真係再行唔到入去monastery，
沿途有人叫我地坐驢仔出返去大門口只需 20jod，我哋以為好平咪試吓，點之就中伏，
驢仔唔太聽話，仲要行得快我都跌過落地，沿途仲要行好高嘅山路，
其實嗰條根本唔係路，係求其搵個捷徑出去，
明明勁斜既路個馬夫都仲要打隻驢仔叫佢落山，嚇得我好在冇同只驢仔一齊碌落山，
我哋仲要俾人呃左唔係送我哋去大門口，而係去咗第二個出口仲要坐車，
一開頭仲想屈我地再俾錢個司機先可以返去大門口，
老虎發癲先可免左(肯定係中東男人未見過咁惡嘅港女😂）
之後終於可以返酒店休息下，不過當然要俾老虎鬧啦😂😂😂
佩特拉之夜 Petra by Night
黎到佩特拉當日雖然都係星期三有 Petra by Night，不過真係太累，唯有等星期四再去，
要知道Petra by Night呢個環節係無任何交通，要行入去treasury再由里面行返出黎，
足足有幾km，如果要去的話真係要預留腳力，
沿途雖然冇任何街燈，都係蠟燭加上月光，不過都夠光猛引領你去到treasury
去到treasury前，地下會鋪庶可坐，
不過日頭呢到有駱駝屎仲有馬屎，小編一早有準備登仔，可以到旁邊攝影愛好者區到坐
之後就會有表演，會有人唱歌非常之有中東色彩，
表演完後就會開燈，呢個時候大家都會不停影，
完左就返酒店，成個petra by night需時約個半至兩小時
文章前段提及酒店附近有間洞穴餐廳，
洞穴餐廳就位於古城入口旁既petra guest house既餐廳，
晚上時候特別有氣分，價錢亦相宜，就算唔黎食晚飯，都可以黎食個水煙感受中東風情
古城佩特拉作為世界7大奇景，雖然長途拔涉，但真的十分值得來觀看
Write a comment